موجعه

لسماع القصيده اضغط هنــآ

وش فرق

وش فَرَقْ ؟ وش فَرَقْ؟
لا حكى صمتي ونطق
لو تكلم عن مشاعر
عن هوى غايب وحاظر
لو يصيرالجرح شاعر
ينظم ابياته كواكب
وينثر احزانه مراكب
فوق شطئان الورق
وش فرق وش فرق؟
الألم هو الألم
وان غدى صوت القلم
وان لبس ثوب الحروف
أو تمثل في طيوف
أو سكب هالآه معنى
في شخوص وفي وصوف
الألم هو الألم
دايم الذكرى عذاب
والخطا عين الصواب
وليلي اللي اسهره
اوله مثل آخره
وسط غابه من الشموع
أحتفي بعرس الدموع
كل شي هادي وساكن
وحدتي وظل الأماكن
إيه ابي انســــــــى
ولكن!!
تعشق الذكرى الرجوع
تعشق الذكرى الرجوع
"كلمات المعنى"

 

علمتنــي "

للشآعــر طلآل الرشيد رحمه الله "
علمتني و شلون أحب
علمني كيف أنسى
يا بحر ضايع فيه
الشط و المرسى
علمتني و شلون أحن
علمني كيف أقسى
سيّر علي .. بس أمسح دموعي و روح
سيّر علي .. جب لي معك قلبٍ و روح
سيّر علي .. إذا تذكرت الجروح
يا طاغي النظرة خطا
تجزى بها البخل العطا
و أنا اللي أهديتك أمن
عين و جفن
هذي فراش .. و ذا غطا
يا جرح
من وين أبتدي؟
و انتَ معي من مولدي
و عيّت يدي
على وداعك تهتدي
بس أنت علمني الجفا
دامي عجزت
أعلمك كيف الوفا
علمتني كيف السهر
و نسيتني الممسى
علمتني وشلون أحب
علمني كيف أنسى ؟ ؟!!

الـمـــسآفــر

للشآعر الأمير بدر بن عبد المحسن"
لا تلوح للمسافر
المسافر راح
ولا تنادي المسافر
المسافر راح
يا ضياع أصواتنا في المدى والريح
القطار وفاتنا
والمسافر راح

يالله يا قلبي تعبنا من الوقوف
ما بقى بالليل نجمة ولا طيوف
ذبلت أنوار الشوارع وإنطفى ضيّ الحروف
يالله يا قلبي سرينا ضاقت الدنيا علينا
القطار وفاتنا
والمسافر راح

مادري باكر هالمدينة وشتكون
النهار والورد الأصفر والغصون
هذا وجهك يالمسافر لما كانت لي عيون
وينها عيوني حبيبي
سافرت مثلك حبيبي
القطار وفاتنا
والمسافر راح

زمان الصمت

للشآعر الأمير بدر بن عبد المحسن"

وتِرحَل ..

صَرخَتي تِذبَل

في وادي .. لا صدى يوصل

ولا باقي أنين

زمان الصمت ..

يا عُمر الحُزن والشكوى

يا خطوة ما غدت تقوى

على الخطوة ... على هم السنين

حبيبي .. كتبت اسمك على صوتي

كتبته .. في جدار الوقت

على لون السما الهادي

على الوادي ..

على موتي ... وميلادي

حبيبي .. لو أيادي الصمت

خذتني ... لو ملتني ليل

أنا عمري .. انتظاري لك

لا تحرمني .. حياتي لك

جمرة غضى

للشآعر الأمير بدر بن عبد المحسن"
جمرة غضى .. أضمها بكفي
أضمها حيل . .
أبي الدفا .. لو تحترق كفي
وأبي سفر لليل
بردان أنا تكفى .. أبي احترق بدفا
لعيونك التحنان .. فعيونك المنفى
جيتك من الإعصار .. جفني المطر .. والنار
جمرة غضى
والله الجفا برد .. وقل الوفا برد
والموعد المهجور ما ينبت الورد
ياحبي المغرور .. ياللي دفاك اشعور
رد القمر للنور .. واحلى العمر .. في وعد
بردان .. بردان أنا تكفى.. أبي احترق بدفا
يا أول الحب .. شفتك أنا مره
واهديت لك قلب
ورديت لي جمرة
ومن يومها كان الرحيل
وليل الشتا .. القاسي الطويل
وآه يا الحنين
لليل باب له حارسين
برد وسحاب

الفجر البعيد

للشـآعر الأمير بدر بن عبد المحسن
نامت عيونك
وصحى الليل مظنونك أغاني
قصّت جناح الثواني غيبتك
وصارت الساعة أماني

وآه ..آه
أنا حروفي في غيابك
لا هي حكي ولا هي قصيد
أكتب الظلما وأعيد
وإنت يالفجر البعيد .. نامت عيونك

إسهر معي ليلة
حاول تحس بلوعتي ليلة
عد النجوم وش كثرها.. ياللي بقلبي كثرها
نام .. القمر ف وسادتك نام
ليتك تغير عادتك
خل القمر ليله.. يسهر معي ليله

أنا حروفي في غيابك
لا هي حكي ولا هي قصيد
أكتب الظلما وأعيد
وإنت يالفجر البعيد.. نامت عيونك

يا ساحر البسمه .. أساهرك نجمه
وابسمعك كلمه .. كلمه و لو كلمه
قم نادني .. يالله عسى تحتاجني
وإن مر ليلي ما سألت

وإن زاد ظلمك ما عدلت

آه.. آه
أنا حروفي في غيابك
لا هي حكي ولا هي قصيد
أكتب الظلما وأعيد
وإنت ياالفجر البعيد.. نامت عيونك

مـج ـــنونــهـآ

للشآعر الأمير بدر بن عبد المحسن"
لعيونها بس لعيونها
قلبي سراب بدونها ..
قلبي سراب وعيني سراب
ما اقول أعشقها بعقل
مجنونها
البارحة مريت في أحلى الفصول
صيف وشتاء
وناظرتها
وقلبي يقول هذي العيون إلى متى
حبيبتي ياكثرها عيونك على هالليل
وين ما التفت اشوفها ..
حبيبتي يازينها عيونك على هالليل
سحرني برق سيوفها
ما أقول أعشقها بعقل
مجنونها
قمري يا شمس الذهب
سفري وراء عيونك تعب
قلبي تعب وصبري تعب
ومن الهدب لين الهدب
بحر ومراكب من لهب
أمواج تبحر برضاه
وأمواج تلعب بي غضب

كل ما اقفيت

للشاعر الامير بدر بن عبد المحسن"

كل ما اقفيت ناداني تعال ,,,, وكل ما اقبلت عزّم بالرحيل

وكل ما اجنبت واعدني شمال ,,,, يا هـَل الحب ضيـّعت الدليل

الحقيقه غدت مثل الخيال ,,,, هــو عدوّي وهو أوفى خليل

شفت انا الظلم في بعض الدلال ,,,, يجرح القلب لو كانه جميل

اشهد ان الهوى مابه عدال ,,,, هو خليٍّ وانا قــــلبي عليل

وكل ما قلت له يابن الحلال ,,,, المحبه عـــطى وانته بخيل

التفت يمـّي وهو عجل ٍ وقال ,,,, لذة الحب في الشي القليل

صوتك ينــآدينــي

للشاعر بدر بن عبد المحسن "
صوتك يناديني .. يناديني تِذكَّر
تِذكَّر الحلم الصَّغير ..
وجدار مِن طين وحصير ..
وقمرا ورا الَّليل الضَّرير .. عِند الغدير
وإن هبَّت النِسمه .. تِكسَّر
تِذكَّر ..
جيتي مِن النَّسيان .. ومِن كلَّ الزَّمان
الَّلي مضى .. والَّلي تغيَّر
صوتك يناديني .. يناديني تِذكَّر
* * * * * *
ناديت خانتني السَّنين الَّلي مِضت .. راحت
ناديت ماكِنَّ السَّنين الَّلي مِضت .. راحت
كِنَّا إفترقنا .. البارحه
والبارحه صارت عمر ..
ليله أبد عيَّت تمرَّ ..
ياجمرةَ الشَّوق الخفي .. نسيت أنا
نسيت أنا وجرحِك وفيَّ
* * * * * *
ريَّانةَ العود .. نادي الَّليالي تعود
بشوقِ الهوى .. بوعود
وجهي الَّلي ضيَّعته زمان ..
في عيونك السود ..
يا البسمةَ العذبه .. عنك الصبر كِذبه ..
وفيك العمر موعود ..
إشتقتك للحلم الصَّغير ..
وجدار مِن طين وحصير ..
وقمرا ورا الَّليل الضَّرير .. عِند الغدير
وإن هبَّت النِسمه .. تِكسَّر
تِذكَّر ..
جيتي مِن النَّسيان .. ومِن كلَّ الزَّمان
الَّلي مضى .. والَّلي تغيَّر
صوتك يناديني .. يناديني تِذكَّر

جَــتــنــي

للشاعر طلال الرشيد رحمه الله

جتني وشافتها عيون حايـرات 

ذا شعاع الشمس او هذا سناها 

ضاعوا اللي جوا معاها مسيرات 

واقبلت تمشي تقل محدٍ معاها 

يا سنا الفضه ويا جيد المهات 

يا شذى نبت الخزامى في وطاها 

قلت كن بوجنتك زهر النبات 

قالت ان الرمش يجرح لي صفاها 

تجرح الظلما عـيون ناعسات 

سلهمت وأغضت تغطرس في بهاها 

حققوا بالشوف في لون الشفاة 

هو خذا منها الشفق والا عطاها 

ولو ظلام اللـيــل يعطينا ثبات 

فيه من لون الشعر والا كساها 

كيف أباصف زين كاملة الصفات 

كيف أباصل في حروفي منتهاها 

عــيـــون الحـــب

للشاعر طلال الرشيد رحمه الله
عيون الحب لا يمكن تناظر ..... عيوب الخل لو هو عيب كله

تماري فيه وبوصفه تكابر ..... ترى من فوق خلق الله محله

رفيق الليل في الشباك ناظر ..... واثاري الليل شباك لخله

حفظ أحلى الكلام وصار شاعر ..... بصبر ينتظر .. والصبر مله

حبيبٍ عشت في دنياه عابر ..... حسب قوله ويا شعري فقله

أنا ضحيت له وارجى وصابر ..... واذا عيا أقول الله يحله

على اللي ينتظر يا بعد باكر ..... يبي السلوان والذكرى تضله

عيون الحب في قلبي تناظر ..... تشوف اللي عيوني ما تدله

الـيــوم ذكــرى الـفـراق

للشاعر طلال الرشيد رحمه الله

اليوم ذكرى الفراق ومرت أول سنه  ... اليوم لي عام متغرب وحيد وحزين 

اليوم انا ضيف جرحي جيت بطمنه  ... اني جمعت الدموع وجبت امانة امين 

ما يجرح الصادق الا غدر من يامنه  ... لا جت من احباب قلبك لا تلوم السنين 

مليت من هالاماني دام هي مو ممكنه  ... لاهي تحقق وانا ياسي بوجهي يبين 

الوين انا وانت مثل الشمس والازمنه  ... مع كل صبح يجددني لشمسك حنين 

لا قلت احــبك .. احبـــك كنها دندنه  ... او كنها وردةٍ مابين اصابع جنـيــــن 

يا اجمل الـناس لك بين الملا هيمنه  ... كثير غيرك ولكن مين مثلك وويـــــن 

ياعــاذلي خذ عيوني يمكـــن تثمنه  ... تشوف عيبه وانا اشوفه ملاك حسين 

امس افترقنا وانا احسب مرت اول سنه ... يا طولها ليلة الفرقا سنة للهزيم